Паёми солонаи Сарвари давлат ба Маҷлиси Олии Ҷумҳурии Тоҷикистон ҳамчун санади муҳимми сиёсиву барномавӣ дар ҳаёти ҷомеа нақши калидӣ дорад. Он на танҳо натиҷаҳои фаъолияти гузашта, балки самтҳо ва ҳадафҳои асосии рушди минбаъдаи кишварро муайян намуда, ба ҳайси роҳнамои боэътимод барои фардои дурахшони давлату миллат хизмат мекунад.
Дар Паём масъалаҳои муҳими таҳкими пояҳои давлатдорӣ, таъмини амнияти миллӣ, суботи сиёсӣ ва ваҳдати ҷомеа мавқеи марказӣ доранд. Сарвари давлат бо таҳлили вазъи ҷаҳони муосир ва равандҳои минтақаӣ зарурати ҳифзи манфиатҳои миллӣ, боло бурдани сатҳи худшиносии шаҳрвандӣ ва таҳкими масъулияти ҳар як фарди ҷомеаро таъкид менамояд. Ин нуктаҳо барои пойдории давлат ва рушди устувори он аҳамияти ҳаётан муҳим доранд.
Яке аз самтҳои калидии Паём ин рушди иқтисодии миллӣ ба ҳисоб рафта дар он масъалаҳои таъмини рушди босуботи иқтисодӣ, истифодаи самараноки захираҳои табиӣ, дастгирии соҳибкорӣ, ҷалби сармоягузорӣ ва таъсиси ҷойҳои нави корӣ ба таври мушаххас муайян карда мешаванд. Ин тадбирҳо ба баланд бардоштани сатҳи зиндагии мардум ва коҳиш додани мушкилоти иҷтимоӣ мусоидат менамоянд.
Дар баробари ин, соҳаҳои иҷтимоӣ — маориф, тандурустӣ, фарҳанг ва ҳифзи иҷтимоии аҳолӣ — дар меҳвари Паём қарор доранд. Таваҷҷуҳи махсус ба тарбияи насли наврасу ҷавонон ҳамчун ояндасозони миллат равона гардида, зарурати баланд бардоштани сатҳи дониш,маърифати ҳуқуқӣ ва ахлоқии онҳо таъкид мешавад. Ин равиш заминаи боэътимод барои ташаккули ҷомеаи солим ва пешрафта мебошад.
Паём ҳамчунин ҷомеаро ба меҳнати созанда, риояи қонуният, таҳкими тартиботи ҷамъиятӣ ва иштироки фаъолона дар ҳаёти сиёсиву иҷтимоии кишвар даъват мекунад. Он ҳар як шаҳрванди кишварро ба масъулиятшиносӣ ва саҳмгузорӣ дар ободию пешрафти Ватан ҳидоят менамояд.
Дар маҷмӯъ, Паём ҳамчун ҳуҷҷати сарнавиштсоз, роҳнамои воқеӣ ба сӯи фардои обод, амн ва дурахшони Тоҷикистон мебошад. Татбиқи муваффақонаи нуктаҳои дар он зикршуда кафолати рушди устувори давлат, таҳкими истиқлолият ва беҳбудии зиндагии ҳар як шаҳрванди кишвар ба шумор меравад.
Мирзоашраф Пайрав Иззатали муовини раиси ноҳияи Шуғнон.
